ਸਿੱਧਾ ਮੁੱਖ ਜਾਣਕਾਰੀ ’ਤੇ ਜਾਓ

ਕਾਨੂੰਨੀ ਸੇਵਾ

ਪਰਿਵਾਰਕ ਕਾਨੂੰਨ (ਫੈਮਿਲੀ ਲਾਅ)

ਵਿਆਹ ਜਾਂ ਕਿਸੇ ਹੋਰ ਪਰਿਵਾਰਕ ਰਿਸ਼ਤੇ ਦਾ ਟੁੱਟਣਾ ਝਗੜੇ ਵਾਲਾ ਅਤੇ ਦੁੱਖ ਭਰਿਆ ਸਮਾਂ ਹੋ ਸਕਦਾ ਹੈ। ਜਿੱਥੇ ਹੋ ਸਕੇ, ਅਸੀਂ ਛੇਤੀ ਹੱਲ ਲੱਭਣ ਅਤੇ ਅਦਾਲਤ ਤੋਂ ਬਾਹਰ ਸਮਝੌਤਾ ਕਰਨ ’ਤੇ ਜ਼ੋਰ ਦਿੰਦੇ ਹਾਂ। ਜਦੋਂ ਫ਼ੈਸਲਾ ਜੱਜ ਨੂੰ ਕਰਨਾ ਪਵੇ, ਤਾਂ ਅਸੀਂ ਬ੍ਰਿਟਿਸ਼ ਕੋਲੰਬੀਆ ਦੀ ਸੂਬਾਈ ਅਦਾਲਤ (Provincial Court of British Columbia) ਅਤੇ ਬ੍ਰਿਟਿਸ਼ ਕੋਲੰਬੀਆ ਦੀ ਸੁਪਰੀਮ ਕੋਰਟ (Supreme Court of British Columbia) ਵਿੱਚ ਕਲਾਇੰਟਾਂ ਦੇ ਵਕੀਲ ਵਜੋਂ ਪੇਸ਼ ਹੁੰਦੇ ਹਾਂ।

ਆਖ਼ਰੀ ਵਾਰ ਜਾਂਚਿਆ:

ਅਸੀਂ ਪਰਿਵਾਰਕ ਕਾਨੂੰਨ ਦੇ ਹਰ ਤਰ੍ਹਾਂ ਦੇ ਮਾਮਲਿਆਂ ਵਿੱਚ ਕਲਾਇੰਟਾਂ ਦੇ ਵਕੀਲ ਵਜੋਂ ਕੰਮ ਕਰਦੇ ਹਾਂ: ਵੱਖ ਹੋਣ ਦੇ ਲਿਖਤੀ ਸਮਝੌਤੇ (separation agreements), ਵਿਵਾਦ ਵਾਲਾ ਅਤੇ ਬਿਨਾਂ ਵਿਵਾਦ ਤਲਾਕ, ਬੱਚਿਆਂ ਦੀ ਦੇਖਭਾਲ ਦੇ ਪ੍ਰਬੰਧ (parenting arrangements), ਬੱਚਿਆਂ ਦਾ ਖ਼ਰਚਾ (child support) ਅਤੇ ਪਤੀ ਜਾਂ ਪਤਨੀ ਨੂੰ ਖ਼ਰਚਾ (spousal support), ਅਤੇ ਪਰਿਵਾਰ ਦੀ ਜਾਇਦਾਦ ਅਤੇ ਕਰਜ਼ੇ ਦੀ ਵੰਡ। ਜਿੱਥੇ ਗੱਲਬਾਤ ਨਾਲ ਸਮਝੌਤਾ ਹੋ ਸਕਦਾ ਹੈ, ਅਸੀਂ ਉਸ ਲਈ ਕੰਮ ਕਰਦੇ ਹਾਂ। ਜਿੱਥੇ ਨਹੀਂ ਹੋ ਸਕਦਾ, ਉੱਥੇ ਸਾਡੇ ਪਰਿਵਾਰਕ ਕਾਨੂੰਨ ਦੇ ਵਕੀਲਾਂ ਨੂੰ ਬ੍ਰਿਟਿਸ਼ ਕੋਲੰਬੀਆ ਦੀ ਸੁਪਰੀਮ ਕੋਰਟ ਅਤੇ ਸੂਬਾਈ ਅਦਾਲਤ ਵਿੱਚ ਮੁਕੱਦਮਿਆਂ (trials) ਅਤੇ ਅਦਾਲਤੀ ਕੇਸਾਂ ਦਾ ਤਜਰਬਾ ਹੈ।

ਅਦਾਲਤਾਂ
ਬ੍ਰਿਟਿਸ਼ ਕੋਲੰਬੀਆ ਦੀ ਸੂਬਾਈ ਅਦਾਲਤ ਅਤੇ ਸੁਪਰੀਮ ਕੋਰਟ
ਸਾਡਾ ਤਰੀਕਾ
ਜਿੱਥੇ ਹੋ ਸਕੇ, ਛੇਤੀ ਹੱਲ ਅਤੇ ਸਮਝੌਤਾ
ਆਰਜ਼ੀ ਹੁਕਮ (interim orders)
ਜਦੋਂ ਗੱਲਬਾਤ ਚੱਲ ਰਹੀ ਹੋਵੇ ਜਾਂ ਮੁਕੱਦਮੇ ਦੀ ਉਡੀਕ ਹੋਵੇ, ਉਦੋਂ ਮੰਗੇ ਜਾਂਦੇ ਹਨ
ਦੂਜਾ ਰਾਹ
ਮੀਡੀਏਸ਼ਨ (ਵਿਚੋਲਗੀ) (ਪੰਨਾ ਅੰਗਰੇਜ਼ੀ ਵਿੱਚ ਹੈ), ਲਾਅ ਸੁਸਾਇਟੀ ਆਫ਼ ਬ੍ਰਿਟਿਸ਼ ਕੋਲੰਬੀਆ (Law Society of British Columbia, LSBC) ਤੋਂ ਮਾਨਤਾ-ਪ੍ਰਾਪਤ ਮੀਡੀਏਟਰਾਂ ਨਾਲ

ਵੱਖ ਹੋਣ, ਵਿਆਹ ਅਤੇ ਇਕੱਠੇ ਰਹਿਣ ਦੇ ਸਮਝੌਤੇ

ਵੱਖ ਹੋਣ ਦਾ ਸਮਝੌਤਾ (separation agreement) ਇੱਕ ਲਿਖਤੀ ਇਕਰਾਰਨਾਮਾ ਹੁੰਦਾ ਹੈ। ਇਸ ਵਿੱਚ ਉਹ ਮਸਲੇ ਨਿਪਟਾਏ ਜਾਂਦੇ ਹਨ ਜੋ ਰਿਸ਼ਤਾ ਖ਼ਤਮ ਹੋਣ ’ਤੇ ਖੜ੍ਹੇ ਹੁੰਦੇ ਹਨ: ਬੱਚਿਆਂ ਦੀ ਦੇਖਭਾਲ ਦੇ ਪ੍ਰਬੰਧ, ਬੱਚਿਆਂ ਦਾ ਖ਼ਰਚਾ ਅਤੇ ਪਤੀ ਜਾਂ ਪਤਨੀ ਨੂੰ ਖ਼ਰਚਾ, ਅਤੇ ਜਾਇਦਾਦ ਅਤੇ ਕਰਜ਼ੇ ਦੀ ਵੰਡ। ਸਾਫ਼-ਸਾਫ਼ ਲਿਖਿਆ ਸਮਝੌਤਾ ਅਕਸਰ ਮਸਲੇ ਹੱਲ ਕਰਨ ਦਾ ਸਭ ਤੋਂ ਕਾਰਗਰ ਤਰੀਕਾ ਹੁੰਦਾ ਹੈ। ਇਸ ਨਾਲ ਦੋਵੇਂ ਧਿਰਾਂ ਵਿਵਾਦ ਵਾਲੇ ਅਦਾਲਤੀ ਕੇਸ ਦੇ ਖ਼ਰਚੇ ਅਤੇ ਬੇਯਕੀਨੀ ਤੋਂ ਬਚ ਸਕਦੀਆਂ ਹਨ।

ਜੋ ਜੋੜੇ ਵਿਆਹ ਕਰ ਰਹੇ ਹਨ ਜਾਂ ਇਕੱਠੇ ਰਹਿਣ ਲੱਗੇ ਹਨ, ਉਹ ਪਹਿਲਾਂ ਹੀ ਲਿਖਤੀ ਸਮਝੌਤਾ ਕਰ ਸਕਦੇ ਹਨ: ਵਿਆਹ ਬਾਰੇ ਸਮਝੌਤਾ (marriage agreement) ਜਾਂ ਇਕੱਠੇ ਰਹਿਣ ਦਾ ਸਮਝੌਤਾ (cohabitation agreement)। ਇਸ ਵਿੱਚ ਉਹ ਤੈਅ ਕਰ ਸਕਦੇ ਹਨ ਕਿ ਜੇ ਰਿਸ਼ਤਾ ਖ਼ਤਮ ਹੋ ਗਿਆ, ਤਾਂ ਜਾਇਦਾਦ ਅਤੇ ਹੋਰ ਮਸਲਿਆਂ ਦਾ ਕੀ ਹੋਵੇਗਾ।

ਬਿਨਾਂ ਵਿਵਾਦ ਤਲਾਕ

ਬਿਨਾਂ ਵਿਵਾਦ ਤਲਾਕ (uncontested divorce) ਵਿੱਚ, ਪਤੀ ਜਾਂ ਪਤਨੀ ਵਿੱਚੋਂ ਇੱਕ ਜਣਾ ਬ੍ਰਿਟਿਸ਼ ਕੋਲੰਬੀਆ ਦੀ ਸੁਪਰੀਮ ਕੋਰਟ ਵਿੱਚ Notice of Family Claim (ਸੁਪਰੀਮ ਕੋਰਟ ਵਿੱਚ ਕੇਸ ਸ਼ੁਰੂ ਕਰਨ ਦਾ ਫ਼ਾਰਮ) ਦਾਇਰ ਕਰਕੇ ਕੇਸ ਸ਼ੁਰੂ ਕਰਦਾ ਹੈ, ਅਤੇ ਇਹ ਫ਼ਾਰਮ ਦੂਜੇ ਨੂੰ ਬਾਕਾਇਦਾ ਪਹੁੰਚਾਉਂਦਾ (serve ਕਰਦਾ) ਹੈ। ਜੇ ਦੂਜਾ ਜਣਾ ਕੋਈ ਜਵਾਬ ਦਾਇਰ ਨਹੀਂ ਕਰਦਾ, ਅਤੇ ਦੋਵੇਂ ਘੱਟੋ-ਘੱਟ ਇੱਕ ਸਾਲ ਤੋਂ ਵੱਖ ਰਹਿ ਰਹੇ ਹਨ, ਤਾਂ ਬਾਕੀ ਫ਼ਾਰਮ ਦਾਇਰ ਕੀਤੇ ਜਾਂਦੇ ਹਨ। ਇਨ੍ਹਾਂ ਫ਼ਾਰਮਾਂ ਵਿੱਚ ਅਦਾਲਤ ਤੋਂ ਤਲਾਕ ਦਾ ਹੁਕਮ (divorce order) ਮੰਗਿਆ ਜਾਂਦਾ ਹੈ। ਜੇ ਬੱਚਿਆਂ ਦੀ ਦੇਖਭਾਲ, ਖ਼ਰਚੇ ਅਤੇ ਜਾਇਦਾਦ ਬਾਰੇ ਸਭ ਕੁਝ ਤੈਅ ਹੋ ਚੁੱਕਾ ਹੈ, ਤਾਂ ਆਮ ਤੌਰ ’ਤੇ ਦੋਹਾਂ ਵਿੱਚੋਂ ਕਿਸੇ ਨੂੰ ਵੀ ਅਦਾਲਤ ਵਿੱਚ ਪੇਸ਼ ਹੋਣ ਦੀ ਲੋੜ ਨਹੀਂ ਪੈਂਦੀ।

ਜੇ ਬੱਚੇ ਹਨ, ਤਾਂ ਤਲਾਕ ਦੇਣ ਤੋਂ ਪਹਿਲਾਂ ਅਦਾਲਤ ਨੂੰ ਇਹ ਤਸੱਲੀ ਕਰਨੀ ਪੈਂਦੀ ਹੈ ਕਿ ਉਨ੍ਹਾਂ ਦੇ ਖ਼ਰਚੇ ਲਈ ਵਾਜਬ ਪ੍ਰਬੰਧ ਕੀਤੇ ਗਏ ਹਨ। ਤਲਾਕ ਦਾ ਹੁਕਮ ਹੋਣ ਤੋਂ ਬਾਅਦ 31ਵੇਂ ਦਿਨ ਤਲਾਕ ਲਾਗੂ ਹੁੰਦਾ ਹੈ।

ਵਿਵਾਦ ਵਾਲਾ ਤਲਾਕ

ਜੇ ਤੁਸੀਂ ਅਤੇ ਤੁਹਾਡਾ ਪਤੀ ਜਾਂ ਪਤਨੀ ਬੱਚਿਆਂ ਦੀ ਦੇਖਭਾਲ, ਖ਼ਰਚੇ, ਜਾਂ ਜਾਇਦਾਦ ਅਤੇ ਕਰਜ਼ੇ ਦੀ ਵੰਡ ਬਾਰੇ ਸਹਿਮਤ ਨਹੀਂ ਹੋ ਸਕਦੇ, ਤਾਂ ਤਲਾਕ ਵਿਵਾਦ ਵਾਲਾ (contested) ਹੈ। ਅਸੀਂ ਕੋਸ਼ਿਸ਼ ਕਰਦੇ ਹਾਂ ਕਿ ਝਗੜੇ ਵਾਲੇ ਮਸਲੇ ਘਟਣ ਅਤੇ ਮੁਕੱਦਮੇ ਤੋਂ ਪਹਿਲਾਂ ਸਮਝੌਤਾ ਹੋ ਜਾਵੇ। ਇਸ ਲਈ ਅਸੀਂ ਗੱਲਬਾਤ ਕਰਦੇ ਹਾਂ, ਅਤੇ ਖ਼ਰਚੇ, ਬੱਚਿਆਂ ਦੀ ਦੇਖਭਾਲ ਅਤੇ ਜਾਇਦਾਦ ਬਾਰੇ ਸਮਝੌਤੇ ਤਿਆਰ ਕਰਦੇ ਹਾਂ।

ਜੇ ਹਰ ਮਸਲੇ ’ਤੇ ਸਮਝੌਤਾ ਨਹੀਂ ਹੋ ਸਕਦਾ, ਤਾਂ ਬਾਕੀ ਮਸਲਿਆਂ ਦਾ ਫ਼ੈਸਲਾ ਜੱਜ ਮੁਕੱਦਮੇ (trial) ਵਿੱਚ ਕਰਦੇ ਹਨ। ਜਦੋਂ ਗੱਲਬਾਤ ਚੱਲ ਰਹੀ ਹੋਵੇ ਜਾਂ ਮੁਕੱਦਮੇ ਦੀ ਉਡੀਕ ਹੋਵੇ, ਉਦੋਂ ਅਸੀਂ ਆਰਜ਼ੀ ਹੁਕਮਾਂ (interim orders) ਲਈ ਅਰਜ਼ੀ ਦੇ ਸਕਦੇ ਹਾਂ। ਇਹ ਹੁਕਮ ਤੰਗੀ ਘਟਾਉਣ ਜਾਂ ਜ਼ਰੂਰੀ ਮਸਲੇ ਨਿਪਟਾਉਣ ਲਈ ਹੁੰਦੇ ਹਨ।

ਬੱਚਿਆਂ ਦੀ ਦੇਖਭਾਲ ਦੇ ਪ੍ਰਬੰਧ ਅਤੇ ਗਾਰਡੀਅਨਸ਼ਿਪ

ਬੀ ਸੀ ਦਾ ਫੈਮਿਲੀ ਲਾਅ ਐਕਟ (Family Law Act) ਅਤੇ ਕੈਨੇਡਾ ਦਾ ਤਲਾਕ ਕਾਨੂੰਨ, ਡਾਇਵੋਰਸ ਐਕਟ (Divorce Act), ਹੁਣ “ਕਸਟਡੀ” (custody) ਅਤੇ “ਐਕਸੈੱਸ” (access) ਸ਼ਬਦ ਨਹੀਂ ਵਰਤਦੇ। ਫੈਮਿਲੀ ਲਾਅ ਐਕਟ ਮੁਤਾਬਕ, ਬੱਚਿਆਂ ਦੀ ਦੇਖਭਾਲ ਦੇ ਪ੍ਰਬੰਧ (parenting arrangements) ਇਹ ਤੈਅ ਕਰਦੇ ਹਨ ਕਿ ਬੱਚੇ ਦੇ ਗਾਰਡੀਅਨ (guardians) ਦੋ ਚੀਜ਼ਾਂ ਆਪਸ ਵਿੱਚ ਕਿਵੇਂ ਵੰਡਣਗੇ। ਪਹਿਲੀ, ਮਾਪਿਆਂ ਦੀਆਂ ਜ਼ਿੰਮੇਵਾਰੀਆਂ (parental responsibilities), ਭਾਵ ਬੱਚੇ ਦੀ ਦੇਖਭਾਲ, ਪੜ੍ਹਾਈ ਅਤੇ ਸਿਹਤ ਬਾਰੇ ਫ਼ੈਸਲੇ। ਦੂਜੀ, ਪਾਲਣ-ਪੋਸ਼ਣ ਦਾ ਸਮਾਂ (parenting time)। ਡਾਇਵੋਰਸ ਐਕਟ ਇਨ੍ਹਾਂ ਲਈ ਇਹ ਸ਼ਬਦ ਵਰਤਦਾ ਹੈ: ਬੱਚੇ ਬਾਰੇ ਫ਼ੈਸਲੇ ਲੈਣ ਦੀ ਜ਼ਿੰਮੇਵਾਰੀ (decision-making responsibility) ਅਤੇ ਪਾਲਣ-ਪੋਸ਼ਣ ਦਾ ਸਮਾਂ (parenting time)। ਦੋਹਾਂ ਕਾਨੂੰਨਾਂ ਵਿੱਚ ਫ਼ੈਸਲਾ ਇਸ ਸਵਾਲ ’ਤੇ ਹੁੰਦਾ ਹੈ ਕਿ ਬੱਚੇ ਦੇ ਸਰਵੋਤਮ ਹਿੱਤ (best interests of the child) ਕੀ ਹਨ, ਭਾਵ ਬੱਚੇ ਲਈ ਸਭ ਤੋਂ ਚੰਗਾ ਕੀ ਹੈ।

  • ਪਾਲਣ-ਪੋਸ਼ਣ ਦਾ ਸਮਾਂ ਅਤੇ ਬੱਚੇ ਬਾਰੇ ਫ਼ੈਸਲੇ ਲੈਣ ਦੀ ਜ਼ਿੰਮੇਵਾਰੀ
  • ਬੱਚਿਆਂ ਦੀ ਗਾਰਡੀਅਨਸ਼ਿਪ (guardianship)
  • ਬੱਚੇ ਦਾ ਉਨ੍ਹਾਂ ਹੋਰ ਲੋਕਾਂ ਨਾਲ ਸੰਪਰਕ (contact) ਜੋ ਉਸ ਲਈ ਅਹਿਮ ਹਨ, ਜਿਵੇਂ ਦਾਦਾ-ਦਾਦੀ ਜਾਂ ਨਾਨਾ-ਨਾਨੀ
  • ਬੱਚੇ ਨਾਲ ਦੂਜੀ ਥਾਂ ਰਹਿਣ ਜਾਣਾ (relocation): ਜੋ ਗਾਰਡੀਅਨ ਬੱਚੇ ਨੂੰ ਨਾਲ ਲੈ ਕੇ ਕਿਤੇ ਹੋਰ ਰਹਿਣ ਜਾਣਾ ਚਾਹੁੰਦਾ ਹੈ, ਉਸ ਨੂੰ ਆਮ ਤੌਰ ’ਤੇ ਘੱਟੋ-ਘੱਟ 60 ਦਿਨ ਪਹਿਲਾਂ ਲਿਖਤੀ ਨੋਟਿਸ ਦੇਣਾ ਪੈਂਦਾ ਹੈ

ਜੇ ਤੁਸੀਂ ਆਪਣੇ ਸਾਬਕਾ ਪਤੀ ਜਾਂ ਪਤਨੀ ਨਾਲ ਇਸ ਗੱਲ ’ਤੇ ਸਹਿਮਤ ਨਹੀਂ ਹੋ ਸਕਦੇ ਕਿ ਬੱਚੇ ਕਿੱਥੇ ਰਹਿਣਗੇ ਅਤੇ ਉਨ੍ਹਾਂ ਬਾਰੇ ਫ਼ੈਸਲੇ ਕਿਵੇਂ ਹੋਣਗੇ, ਤਾਂ ਅਸੀਂ ਸਮਝੌਤਾ ਕਰਨ ਵਿੱਚ ਤੁਹਾਡੀ ਮਦਦ ਕਰ ਸਕਦੇ ਹਾਂ। ਲੋੜ ਪੈਣ ’ਤੇ ਅਸੀਂ ਅਦਾਲਤ ਤੋਂ ਹੁਕਮਾਂ ਲਈ ਅਰਜ਼ੀ ਦਿੰਦੇ ਹਾਂ। ਜੇ ਪਰਿਵਾਰਕ ਹਿੰਸਾ ਜਾਂ ਬੱਚੇ ਦੀ ਸੁਰੱਖਿਆ ਬਾਰੇ ਚਿੰਤਾ ਹੋਵੇ, ਤਾਂ ਅਸੀਂ ਇਹ ਅਰਜ਼ੀ ਜ਼ਰੂਰੀ ਮਾਮਲੇ ਵਜੋਂ (on an urgent basis) ਦਿੰਦੇ ਹਾਂ।

ਬੱਚਿਆਂ ਦਾ ਖ਼ਰਚਾ ਅਤੇ ਪਤੀ ਜਾਂ ਪਤਨੀ ਨੂੰ ਖ਼ਰਚਾ

ਵੱਖ ਹੋਣ ਵੇਲੇ ਸਭ ਤੋਂ ਅਹਿਮ ਗੱਲ ਇਹ ਹੁੰਦੀ ਹੈ ਕਿ ਬੱਚਿਆਂ ਦੀਆਂ ਲੋੜਾਂ ਕਿਵੇਂ ਪੂਰੀਆਂ ਹੋਣਗੀਆਂ। ਬੱਚਿਆਂ ਦਾ ਖ਼ਰਚਾ (child support) ਆਮ ਤੌਰ ’ਤੇ ਬੱਚਿਆਂ ਦੇ ਖ਼ਰਚੇ ਬਾਰੇ ਸਰਕਾਰੀ ਸੇਧਾਂ (Federal Child Support Guidelines) ਮੁਤਾਬਕ ਗਿਣਿਆ ਜਾਂਦਾ ਹੈ। ਪਤੀ ਜਾਂ ਪਤਨੀ ਨੂੰ ਖ਼ਰਚਾ (spousal support) ਅਕਸਰ ਪਤੀ/ਪਤਨੀ ਦੇ ਖ਼ਰਚੇ ਬਾਰੇ ਸੇਧਾਂ (Spousal Support Advisory Guidelines) ਨੂੰ ਧਿਆਨ ਵਿੱਚ ਰੱਖ ਕੇ ਤੈਅ ਕੀਤਾ ਜਾਂਦਾ ਹੈ। ਦੋਹਾਂ ਨੂੰ ਖ਼ਾਸ ਹਾਲਾਤ ਮੁਤਾਬਕ, ਜਾਂ ਆਪਸੀ ਸਮਝੌਤੇ ਨਾਲ, ਬਦਲਿਆ ਜਾ ਸਕਦਾ ਹੈ।

ਜਦੋਂ ਪਤੀ ਜਾਂ ਪਤਨੀ ਦੀ ਕਮਾਈ ਜ਼ਿਆਦਾਤਰ ਨਕਦ ਵਿੱਚ ਹੁੰਦੀ ਹੈ, ਤਾਂ ਖ਼ਰਚੇ ਦੇ ਹਿਸਾਬ ਲਈ ਢੁਕਵੀਂ ਆਮਦਨ ਤੈਅ ਕਰਵਾਉਣ ਦਾ ਸਾਨੂੰ ਤਜਰਬਾ ਹੈ। ਇਸ ਨਾਲ ਜੁੜੀ ਟੈਕਸ ਦੀ ਇੱਕ ਗੱਲ ਲਈ, ਸਾਡਾ ਲੇਖ ਪੜ੍ਹੋ: ਖ਼ਰਚੇ ਦੀਆਂ ਅਦਾਇਗੀਆਂ ਲਈ ਲੱਗੀ ਵਕੀਲ ਦੀ ਫ਼ੀਸ (ਪੰਨਾ ਅੰਗਰੇਜ਼ੀ ਵਿੱਚ ਹੈ)।

ਜਾਇਦਾਦ ਦੀ ਵੰਡ

ਫੈਮਿਲੀ ਲਾਅ ਐਕਟ ਮੁਤਾਬਕ, ਆਮ ਤੌਰ ’ਤੇ ਪਤੀ ਅਤੇ ਪਤਨੀ ਦੋਹਾਂ ਦਾ ਪਰਿਵਾਰ ਦੀ ਜਾਇਦਾਦ ’ਤੇ ਹੱਕ ਹੁੰਦਾ ਹੈ, ਅਤੇ ਪਰਿਵਾਰ ਦੇ ਕਰਜ਼ੇ ਦੀ ਜ਼ਿੰਮੇਵਾਰੀ ਵੀ ਦੋਹਾਂ ਦੀ ਹੁੰਦੀ ਹੈ। ਇਸ ਨਾਲ ਕੋਈ ਫ਼ਰਕ ਨਹੀਂ ਪੈਂਦਾ ਕਿ ਜਾਇਦਾਦ ਕਿਸ ਦੇ ਨਾਂ ’ਤੇ ਹੈ। ਕੁਝ ਜਾਇਦਾਦ ਵੰਡ ਤੋਂ ਬਾਹਰ ਰਹਿ ਸਕਦੀ ਹੈ (excluded property), ਜਿਵੇਂ ਉਹ ਜਾਇਦਾਦ ਜੋ ਕੋਈ ਰਿਸ਼ਤੇ ਵਿੱਚ ਆਉਣ ਵੇਲੇ ਨਾਲ ਲੈ ਕੇ ਆਇਆ, ਵਿਰਾਸਤ ਵਿੱਚ ਮਿਲੀ ਜਾਇਦਾਦ, ਅਤੇ ਦੂਜਿਆਂ ਤੋਂ ਮਿਲੇ ਤੋਹਫ਼ੇ।

ਪਰਿਵਾਰ ਦੇ ਘਰ ਅਤੇ ਹੋਰ ਜਾਇਦਾਦ ਦਾ ਨਿਪਟਾਰਾ ਕਰਨ ਵੇਲੇ ਬਹੁਤ ਬੇਯਕੀਨੀ ਹੋ ਸਕਦੀ ਹੈ। ਅਸੀਂ ਕੋਸ਼ਿਸ਼ ਕਰਦੇ ਹਾਂ ਕਿ ਤੁਹਾਨੂੰ ਉਹ ਮਿਲੇ ਜਿਸ ਦੇ ਤੁਸੀਂ ਹੱਕਦਾਰ ਹੋ। ਸਾਡੇ ਪਰਿਵਾਰਕ ਕਾਨੂੰਨ ਦੇ ਵਕੀਲਾਂ ਨੂੰ ਬ੍ਰਿਟਿਸ਼ ਕੋਲੰਬੀਆ ਦੀ ਸੁਪਰੀਮ ਕੋਰਟ ਵਿੱਚ ਜਾਇਦਾਦ ਦੀ ਵੰਡ, ਅਤੇ ਅੱਧੋ-ਅੱਧ ਤੋਂ ਵੱਖਰੀ ਵੰਡ (reapportionment), ਦੇ ਕੇਸਾਂ ਦਾ ਤਜਰਬਾ ਹੈ।

ਸੁਰੱਖਿਆ ਦੇ ਹੁਕਮ ਅਤੇ ਜ਼ਰੂਰੀ ਅਰਜ਼ੀਆਂ

ਜਿੱਥੇ ਪਰਿਵਾਰਕ ਹਿੰਸਾ ਦੀ ਚਿੰਤਾ ਹੋਵੇ, ਉੱਥੇ ਅਦਾਲਤ ਫੈਮਿਲੀ ਲਾਅ ਐਕਟ ਦੇ ਤਹਿਤ ਸੁਰੱਖਿਆ ਦੇ ਹੁਕਮ (protection orders) ਦੇ ਸਕਦੀ ਹੈ। ਬੱਚੇ ਦੀ ਸੁਰੱਖਿਆ ਲਈ ਜ਼ਰੂਰੀ ਅਰਜ਼ੀਆਂ ਵੀ ਦਿੱਤੀਆਂ ਜਾ ਸਕਦੀਆਂ ਹਨ। ਜੇ ਤੁਹਾਨੂੰ ਜਾਂ ਤੁਹਾਡੇ ਬੱਚਿਆਂ ਨੂੰ ਇਸ ਵੇਲੇ ਖ਼ਤਰਾ ਹੈ, ਤਾਂ 911 ’ਤੇ ਫ਼ੋਨ ਕਰੋ।

ਪਰਿਵਾਰ ਦੇ ਬਹੁਤ ਸਾਰੇ ਮਾਮਲੇ ਮੁਕੱਦਮੇ ਤੋਂ ਬਿਨਾਂ ਹੱਲ ਹੋ ਸਕਦੇ ਹਨ। ਅਦਾਲਤ ਤੋਂ ਪਹਿਲਾਂ, ਜਾਂ ਅਦਾਲਤੀ ਕੇਸ ਦੇ ਨਾਲ-ਨਾਲ, ਮਾਨਤਾ-ਪ੍ਰਾਪਤ ਮੀਡੀਏਟਰ ਨਾਲ ਮੀਡੀਏਸ਼ਨ (ਵਿਚੋਲਗੀ) (ਪੰਨਾ ਅੰਗਰੇਜ਼ੀ ਵਿੱਚ ਹੈ) ਬਾਰੇ ਸੋਚਣਾ ਅਕਸਰ ਫ਼ਾਇਦੇਮੰਦ ਹੁੰਦਾ ਹੈ।

ਵਕੀਲ

ਇਸ ਖੇਤਰ ਦੇ ਵਕੀਲ।

Kang & Company ਦੇ ਉਹ ਵਕੀਲ, ਜੋ ਪਰਿਵਾਰਕ ਕਾਨੂੰਨ ਦੇ ਮਾਮਲਿਆਂ ਵਿੱਚ ਕੰਮ ਕਰਦੇ ਹਨ। ਫ਼ਾਈਲਾਂ ’ਤੇ ਮਿਲ ਕੇ ਕੰਮ ਕੀਤਾ ਜਾਂਦਾ ਹੈ, ਇਸ ਲਈ ਤੁਹਾਡੇ ਮਾਮਲੇ ਨੂੰ ਪੂਰੀ ਟੀਮ ਦਾ ਫ਼ਾਇਦਾ ਮਿਲਦਾ ਹੈ।

ਪੂਰੀ ਟੀਮ ਨੂੰ ਮਿਲੋ

ਵਕੀਲ ਨਾਲ ਗੱਲ ਕਰੋ

ਮੁਲਾਕਾਤ ਸਿਰਫ਼ ਪਹਿਲਾਂ ਸਮਾਂ ਲੈ ਕੇ ਹੁੰਦੀ ਹੈ।

ਸਾਡੇ ਸਰੀ ਦਫ਼ਤਰ ਵਿੱਚ, ਜਾਂ ਪਹਿਲਾਂ ਸਮਾਂ ਲੈ ਕੇ ਕੈਲਗਰੀ ਵਿੱਚ। ਢੁਕਵੇਂ ਹਾਲਾਤ ਵਿੱਚ ਮੁਲਾਕਾਤ ਫ਼ੋਨ ਜਾਂ ਵੀਡੀਓ ਰਾਹੀਂ ਵੀ ਹੋ ਸਕਦੀ ਹੈ।